Iinia nuwa utugchat ishamainnum waitkamu

16 mayo 2023

Nuwa aidaun dakitaunak achika juki nuniashkush unupiag juki anigmamu aantsajik akitsuk takamtikbau aina duka, iinia aents aidau nugkeen nagkaemawai tujash Fiscalíanmakesh aantsajik Policíanmakesh denunciamuk ainatsui. Juju utugchat iinia nugkeen nagkaema dusha wajupa kuwashtak awa duka shiig dekabaetsui waagki dekapa juwashbau asamtai aantsag utugchat ishamain nagkaema duka pegkeja anmamtin awasa takamtak diyamu awai. EL FOCO nuwigtu iinia comunicador aidaujai atuegas, juju utugchata dusha wajuk awa nuna shiig dekatatus takasaje, juju mafia aina dusha wajuk nuwaush tsakat, muntsujut datsauch provincia Condorcanqui nuwigtu Bagua, región Amazonasnum batsata nunash unupiag tsanujash juwinawa nuna shiig ejegawagtatus.

Ikaa chicham aibau antuewai: !jau, jau ! !jau, jau ! Juka pachiashbau untsubau ayaku iinianmak tutaiyai. Machik asa, duka kagaku tsatsugtau antuewae, nunak dukug Suwa minak najak ibatjawai, nigka esagmai, kaamjaush wajaknai nuwigtu jegkemtinai  waagki niina nugkeen etsa senchi etsantak sukuamu asa. Iinia chichamai augmatak, nawantug Ipakun jikamsan wainkatasan anentaimtajai waagki ipak usumat nantu waintsuk pujau asan tusa tawai.

Ipakuk 22 mijan ajawai. Nigka, aents dakitaunak achika juki nuniashkush unupiag juki anigmau aina nunu achikam pujau tupikaki wakitki kampatum mijan achika wegawai.  Niina dukuji 50 mijan ajamu iiniayai chichaaak tawai: “mina nawanjuk atsawai, nigka ataktu shiig pujutan achike”. Chichaka nagkanak wakebesemag anentaima wajawai, nawanjin ataktu udupiajag juki anigmajag waitkasajai tusa puyatak senchi waitiawai.

Dukujua duka Limón de Kayamas pujawai, juka comunidatak piipichi nuwigtushkam kanaka awai distrito Nieva, región Amazonas, 1 258 kilómetros  imaan atushat Lima pujusa diyamak awai, niina aishji Ikamjai pujawai, nigka 64 mijan ajawai aantsag Ipaku apajiyai. Ditak pagka jegan jegamak pujuinawai (juka iinia jega chapi jegamkamui, dutiksajik shigki ajigka jegamkamui, taniishak tagkanai), eje vial IV (Wawik – Urakusa – Nieva) yantamen jegamak pujuinawai, juju carretera ainja wegaku provincia Condorcanqui capitaljin jeganui. Juju carreteraya nuwigki, iinia aidau eemkatinme tusa anentaimtusa ujaimua nuwi, Ipaku waitiamuji nagkamnauwai nantu noviembre 2019tin.

Bakichik tsawantai kashikmas nantu noviembretin, Ipak patayi aidaun ijajak comunidad Chapinum wetatus jinkiuwai. Jintaa wetatmam, bakichik nuwa mototaxinum egkemag wegau wajanta chichajak: takatan amastajai, nawantug kuig Tarapoto, región San Martinnum akinau 11 nantu aja nunu kuitamjutkata, 20 soles tsawantai akiktajame tusa tiuwai. Nuwauchik nunu tsawantinig 19 mijan ajakui, wainchatai asamtai dekaskeash tawa tusa anentaimas diisui, juka nuwak mina daajuk María Najash Wepiuwai tusa tiuwai, “wika ame iiniayaitam nuninaitjai” tusashkam tiuwai. Takatan amastajai wemí tusa ibatjam, jeen juju nuwa nuna ayasa wakitki apajin aantsag dukujin wisha Maríajai takakun wetajai tusa tiuwai.

“Atumi nawanjig shig pujustatui, yujumkaik waittsashtatui aantsag jega pujumainush ajittawai tujamiu ayi. Aatus chichasa shiig aneasa awemau ayaji nunika awagkijik iina nawanji pachisaik dekachu ayaji”, tusa buutus dukug Suwa iinia chichamai augmatui. Dukujuk apach chichamnak chichatsui aantsag nawanjishkam. 8 nantu nagkaemaki wegamunum pataa tikiju pujau Ipakuk minitnuwe tusa ujakui, aents pegkegchau aidau dakitaunak achika waitkas dutikam aantsag anigmam pujau tupikakne tusa ujakajui.

.01

Juju ishamain utugchata duka tsawantai tuke nagkaema awai

Ipaknak yuminum nuwigtu carreteranum  jukiu ainawai, comunidadji Limón de Kayamas nagkamas 683 kilómetros centro poblado Pampa Hermosa, región San Martinnum ejegawajui. Pampa Hermosak tsawaig tsumainai, aents batsatkachua anmamtin atsau wantinui tujash kashiik bar aidau nuwigtu night club aidau ujanjamtai nantsemainak imaninawai. María, uchi kuitamjutkata tusa jukiuwa duka, Guillermo Quispenum ejega niijai pujusta tusa dakitaunak ukukiuwai makichik jega tsumain numii jagamkamu aantsag calamina patagbaunum, nigka aentsun unupiag juki anigmau aina nunu achikmap wekaeja tusagkesh anentaimsag dekachui.

Chicham “trata” tawa duka iinia chichamnumak atsawai waagki nuninuk iinia pujutinik atsawai juka agaya tsuwat, utugchat minawai. Juju utugchat shiig ishamaina nunu imatiksa antashbau asamtai apashnum delito tuna dushakam iinia aidau diyamak utugchat muunkesh papii umigka jetemjumainkesh atsui nua duwi kakajus ejebaitsui, Ministerio de Cultura chichaak, iinia aentsuk 70 468 imania kuwashat batsatuinawai región Amazonas, San Martín, Cajamarca nuwigtu Loretoshkam tusa tawai. 

Yama jega nantu achika wegamunmag, yabaikik Ipakuk María nawanjin kuitamak pujusui akiashbaitak. Niijai chichakug iiniayai chichaa ajakui. Juju nuwauchia duka wainmachu asa ayatak nigki puju ajakui nuwigtushkash apach chichamnash chichachu asa. Guillermon wainkug shiig senchi ishama ajakui aantsag anetaimak senchi waittsauwai waagki kuwashta dakitaunak achika dutikatatus waitkasbau asa, Maríak barnum iyashjin sujak pujutai nigki juatuk imatika waitka ajakui.

Makichik tsawantai aagku nantu diciembretin María taa Ipakun aujak dekas ijai barnum takasmi tusa tiuwai. Amek ayatak cerveza sujuktatme tiuwai. Nigka dakitajai tusa tiuwai aankamtai Guillermo senchi suwimauwai nuniak awaantukui “iina jeen pujam nunu akikmashkumek” jakattame tusa. Ibatikam Ipakuk takastajai tiuwai, nunikmatai barnum jukiag anigmaju ainawai. Kuwishkinak Guillermo ashi atantin ajakui.

Ipak utugchat muuntan inagkeakiuwa aantsag kuwashat iinia nuwa Nieva batsata dusha inagkenawai. Yaakat Nievak ikam tepakunum awai aantsag namak Nieva Majanujai tukuniaka nuwi awai, Amazonía Norte Perunum, kuwashat jega edificio aidau jegamjamui aents atushtanmaya minidau batsamsati tusa, juka Condorcanqui capitaljiyai, dekapa Perunum diyamak séptima provincia shiig ujunayai.

Amanda Longinote Días, dukug chicham antugtai 72 mijan ajawai, nigka mijan 1980tin nuwa apajui nemajin católica aidaujai takasuai wajuk kuitamamkuiya pujumainaita aents pegkegchau aidau nuwan unupiag juki nuniashkush dakitaig juki takamtikak waitkau aina nunu unupiaja juwam aig takujish. “Yaunchuk nagkamsa diya diyakua minag nujai apatka yabai tsawanta juwi diyamash juka imanikagkesh yapajinache”, tusa tawai. Cincuenta mijan wakitki diyamak nuwa aishmagjai akitsuk takamtikaku waitka ajakbauwai. Yabaik ima senchi uchi nuwaush tsakat, muntsujut, nuwa tsakaju aidau dakitauk unumpiamu ima kuwashat awai, nuniashkush barnum, campamento minero papiin shiig umitsuk takau aina nuwi aantsag basuun ajau aidaujai unumpiajag juki takamtikamu ainawai.

“Nuwa achika waitkasa dutikamu aidau nuwigtushkam anentaimak waitiakui yaigchamu aina nunu ima senchi iyashjinak sujuinawai. Aents dakitaunak achika juki nuniashkush unupiaja juki anigmamu aina nunak niinak apusag uwakek tikish pegkeg pujutak, takatkesh achikmek pujubaitsume tusa anentai egketuinawai, nua duwi kuwashat nuwa waitkasbau aidauk kakajus jiinmain dekapenatsui”, tusa enfermera Yani Valverde Samekash, centro salud mental Condorcanqui taka nunu chichaak tawai.

.02

Wajupa kuwashta aents dakitaunak achika jukiajash nuniashkush unupiag juki anigmamu aidaush awa duka shiig dekabaitsui

Ipakuk kashi kashinig dakitaigki achika dutikam, senchi jiyaam nuwigtu suwimam nantun inagkee ajakui Pampa Hermosa, San Martín pujusa. Makichik tsawantai aagku nantu febrerotin, amina achigmaku aina duka Chiclayo, región Lambayeque takaak wegagtatui tusa ujakajui. Nunikmatai imachik shiig aneasui awi jegaanuk shiig pujuschainjash tusa tujash yaakat nayantsa pakijan awa nuwi jegaamash pujutak yapajinachui: nunisag dakitaunak waitka ajakajui. Aan senchi waittanum jagauwai waagki Guillermo dakitaunak achika dutiktan nagkamauwai.

Nunikmatai, nuwauchia nunu anentaimak, yabaik kajetsuk wajinak tujutuinawa nunak ashi umiktajai nunikan Marían shiig kumpamaan celularjin segatjai tusa chichaman umigmamkauwai. Nantu mayo 2020tin, Nieva niina waintaiji pujaun intsukui, dutikam nii chichajak tupikaakim mina ubaju jeen weta, ame pujam nuwi tikiju pujawai tusa tiuwai. Dutikam Ipak tupikaki jiinki comisaría El Porvenirnum, distrito Chiclayonum denuncian patasui.

Yacha psicólogo Darío Izaguirre, Centro Emergencia Mujer Condorcanquinum takaa nunu, Ipak denuncia pataamun yaigkua nunu chichaak, juju utugchat nagkaemakiuwa duka shiig imanai waagki nuwa ibatika waitkasbauwaitak niina comunidadjin waketki puja duwi. Aents waitkasbau aina duka kakajus waketchau ainawai aantsag megkaekamtaish megkaekai tusa chicham awaya agaja ukukbaukesh atsawai.

Yabai nuwaush iinia Candy Shimpukat Ayui augmatbauji dekaami, nigka niina comunidadji Ebronnumia, provincia Condorcanqui awa nuwiya jinkiuwai. Makichik tsawantai 28 julio 2021tin yaakat Pecanum weuwai, juka provincia Baguanum awai, uchi kuitamkum takastatme tusa jukiajui.

Dukug Deleana Ayui, Candy dukuji buutus augmatak tawai, kampatum nantu mina nawantug webau nagkaemaki wegae pataa aidau ujatuinak amina tijajum kampatum mijan aja duka Peca ajapam pujume waagki Candyk megkaekau asamtai tusa ujakajui.

“nawanjumnak dakitaunak achika dutikawagme nua duwi tupikak uchinak ajapa ukukme tusa tujamiagbayi. Dekaskeapi tusanuk tatsujai waagki nigka uchinak ajapag ukumainchauwa nuna wii shiig dekagjai” tusa dukug Deleana buu buutus etsejui.

Candy utugchatjik rondero aidau comunidad Nazarethnum, distrito Imaza, Bagua awa nuwi awayamui waagki Ebronnum ima tikiju asamtai. Yabaikish epegkenatsui. Dukuji anentaimsa diyamak Candynak dakitaunak achika jukiag anigmatnume tusa sujuku amain ainawai tusa tawai. Kashi kashinig dukug Deleanak anentan dakumjawai, shiwaaji ayamunum wekaekush Ajutap kuitamkamu ati tusa.

Nuwaush Candy dakitauke achika juki emegkakbauwa duka comisaría Condorcanquinmak denunciashbauwai, juka ipak usumat distrito achiakui: Cenepa, Río Santiago, Santa María de Nieva nuwigtu Imazashkam. Comisarianmak ayatak 18 aents 2022tin megkaekae tusa awayamuk awai, anuiya 8 iman kuwashat uchi tsakat  megkaekamu awayamui. Mijan 2021tin 19 aents megkaekae tusa awayamui nunie mijan 2020tinik aents megkaekamtai chicham awayamuk atsawai.

Untsu utugchat aidau comisaria Amazonasnum awaya iwainakbauwa duka nuwa suwibau, jiyaku anentaimtaku waitkamu aina nunu ima senchi wantinui. “Aents emegkamu nunisag dakitauk achika juki nuniashkush unupiag juki anigmamu aina nunak denuncianak patatuinatsui waagki utugchat muunta nuna shiig anentaimas dekaa delitowapi tusa tuinachu asa”, tusa fiscal Luz Polanco Yañez, fiscalía provincial Especializada contra la Criminalidad Organizada Baguanum taka nunu tawai.

Nuwa yacha duke chichaak juju utugchat aina duka Policianmakesh aantsag Fiscalíanmashkam awayashbau asag wantintsui nuniu asa iwainakchamui, nuniak utugchatak atsauwa nunis wantinui, nuniu asamtai pamuk aidaush takamtak batsatui. “Aantsag juju utugchat aina nunu shiig ejechamua duka iinia aents aidau apach epegkea pujuti shiig  dekashbaunum nuniashkush shiig antashbaunum aniawai nunisag apach chicham dekashbau asamtai aantsag utugchat awayamua dusha iiniampash atsa apachiash awaya nunu shiig dekashbau asamtai” tusa augmatu.

Yabai diismi takat dutikashbaunum nuwa  aidau waitkamu shiig iwainakchamua nunu, mijan 2021tin ayatak 201 nuwa achika waitkasa dutikamu awayamui, nunisag suwibau aantsag jiyaku anentaimtaku waitkamu aina nunu comisaria Condorcanquinum awayamui. Tujash mijan 2022tin ayatak ujumak wantinkabi, apatka diyamak 41% iman ujumak wajasu, ayatak 110 utugchat awayamu iwainakagbayi. Juwiyash wajupa kuwashtak iinia nuwa aidaush mamiksash awayawajiawa duka dekantsui.

.03

Yamajam epegkea pujut

Ipakuk agkan wajasua nuwi nagkamas tukee ipakun usu usumas pujawai waagki iinia nuwak iwagmamak nuwigtu wajiu dekapmamjatatus imani ajaku asamtai.

Guillermo Quispe, aishmag Ipakun achika emegkaak aantsag dakitaunak achika dutikauwa nunak achika cárcel egkeawajui, takamsamuji delito tawa nunuka  aents dakitaunak achika juki nuniashkush unupiag juki anigmaunum 20 mijan akikmak achinak emkemsati tusa ajapamui.maría Najashak 8 mijan akikmak achinak emkemsati tibauwai waagki aishjijai atuegas takamsau asa. Ipakuk niina comunidadjin pujusag chicham awayamunak epegkeuwai, nigka junio 2020tin jata tepea ishamain wajaya nuwi niina comunidadjinik wakitkiuwai.

Ipaku utugchatjinak Fiscalía Provincial Penal Corporativa Chiclayonmaya iinia aents niina chichamen shiig chichau aantsag apach chichamnash shiig chichaun aputus shiig dekajuawajui nunisag Centro Emergencia Mujer Condorcanquinmaya anentaimak waittsai tusa yaimkauwai yacha psicólogojai. Juju utugchata epegkeamua nuninuk kakajus wainnatsui waagki apachi epegkea batsamtaijijai wekaetusa epegkeamu asa.

Nuwaush Matut Impi Ismiño, Gobierno Territorial Autónomo Awajuni atuwee chichaak, kuwashat tutit awagdayaku waitkaniamu aina nunak comunidadnumag epegkea puju ainawai. Juwig aents tutitag wajaunak suwimkanak imannak siwunatsui waagki “kuwashat aents achinkaig tusa akikmaidau awai nunisag apachi epegkea batsamtaijin denuncia patatjusainum tusashkam akikmainawai” tusa tawai.

Nunisag augmatak, uchi tsakat dakitauke achika dutikamu aina duka 1000 soles nagkama 2500 soles imania kuwashtan uchi waitkasbau patayi aidaun akikag “agkanmaega” takamsachua numamtin shiig aneas juwinawai. Uchi waitkasbau aidau anentaimak senchi waittsainum tusa yacha psicólogo aputamush atsawai nua duwi “aents pegkegchau aina duka ataktu nunisag takama puju ainawai waagki suwimak muun suwashbau asamtai”, tusa Matut Impi tawai.

El Gobierno Territorial Autónomo Awajunnumak junin utugchat aina nunu pachisa chichamunakesh jukichi aantsag denunciakesh awayachaje. Tujash juka atsawai tusa tatsuji ayatak nuu delitowai tusa awayashbau asa wantintsui tawai. Ima senchi wantina duka aents dakitauk achika dutikamua anin wantinui nunisag aents megkaekae tusa ronda comunalnum awaibau awai.

“Utugchat aidau (pachisa augmattsa minag duka) nunisag nuwa dakitauke achika dutikamu aina dushakam apachi epegkea batsamtaiji justicia ordinaria peruanaya nuwi epegnati tusa Gobierno Awajunik tine waagki anenjas takamsachua nunis kuwishkin akikmaku asa suwimkan jutsuk nagkanbaitsui”, tusa tawai Matut Impi.

Gobierno Awajunik, Código Procesal Penal Awajunin shiig umiktatus takak pujawai waagki ashi 372 comunidad iinia batsatkamu aina nuwi makichik chichamaik epegkea shiig batsamsatinme tau asa, tujash delito aents achika takamtikaku nuniashkush udupiaja tsanuja anigmamu aina duka juju papiinumak pachisaikesh agagchamui.

Casa comunalnum tuwakag wajuk takatash emakuiya eemkajish wemaenaita tusa pampantuinai, Suwak nawanji Ipakush wajutik ijakush taati tusa nuniashkush chicham awemamunakesh utusanuk antukag tusa anentaim wekaewai, waagki ipak usumat nantu nagkaemaki wegawai nawanji pachis dekatsuk, nigka niina aishji Cenepnumia asamtai niina nugkeen pujustatus weu, kampatum mijam shiig senchi waittsamujinak atushat ukuak.

*

Juju papii agagbaunmak duwik muun Suwa Ipakjai najaneawagmaun augmata nuwiya daa juki augmattsaji yabai tsawanta juwi aentsun dakitaunak achika jukiag nuniashkush unupiag jukiag anigmau aina nunu utugchat muun iinia nugkanum nagkaema nu dekamu ati tusa,  waagki augmatbaunmak jimag nuwa utugchat muunnum iyaawag epegkeawag ipak najanea, nunisag kaishkam suwa najanea, dekas aents aidau atsumtai, usumja iman nuwigtu shiig shiijam dekapmamtai wajasag, nunisag nuwa aidaush kakajam wajasagti tusa muun tuajama nunu anentaimtusa jutish yabai augmatji.

Takasu aidau:

Reportera: Geraldine Santos

Comunicador awajún : Leunel Tomás Kiak

Traductora awajún: Yanua Atamain

Edición de traducción: Cultura Awajún

Ilustrador: Yayo Espinoza

Desarrollo web: Alonso Zambrano

Juju takata duka Servicio Agropecuario para la Investigación y Promoción Económica (SAIPE) yaimkamunum jiinkine, juka proyecto “Protegiendo a los Defensores de los Derechos Humanos y Promoviendo los Derechos a la Tierra en Comunidades Afectadas por Conflictos de Tierras en Perú y Nepal” tawa nuwi takamunum jiinkine, Unión Europea kuwichik atigbanum juju takata duka betek uminkae.